Përpara 6 javësh njoftuam krijimin e klubit tonë të vrapimit me dëshirën për të nxitur këdo kishte nevojë për një shtysë për të nisur vrapin. Që nga e shtuna e parë, një grup (ende) i vogël, ka nisur ngadalë të grumbullojë kilomentra dhe...vula në kartën e klubit :)
Po si funksionon #RURU - Rubi Run Club?
Çdo të shtunë në orën 9:00 një grup me të njohur dhe të panjohur takohemi tek Rubi, dhe rreth orës 9:10 nisim një vrap të lehtë rreth liqenit. Secili mban ritmin e vet dhe shpejtësinë e mundur, e në fund bashkohemi të gjithë në drejtim të Rubit për një kafe, matcha e bisedë njohëse.
Po përse donim një Run Club?
Run clubs janë më shumë se thjesht grupe vrapimi – ato krijojnë komunitet, motivim dhe një stil jetese të shëndetshëm. Shumë prej tyre lidhen me kafenetë e specialitetit, duke e kthyer një vrap të zakonshëm në një ritual social. Pas vrapit, një kafe e shkëlqyer specialiteti, bëhet moment shpërblimi dhe bashkëbisedimi, ku njerëzit ndajnë eksperienca, motivojnë njëri-tjetrin dhe forcojnë lidhjet.
Për kafenetë e specialitetit, kjo është një mundësi për të krijuar një ambient mikpritës për sportistët dhe dashamirësit e kafesë, duke ndërtuar një komunitet të angazhuar rreth cilësisë dhe mirëqenies.
Ne tek Rubi, besojmë tek cilësia e jetës, tek ritualet e vogla, tek afrimiteti mes të ngjashmëve, ndaj mezi presim çdo të shtunë të na bashkoheni në një vrap të lehtë.